Logo
Background Image:© Francesca Todde / Contrasto from the series A Sensitive Education
Background Image:© Francesca Todde / Contrasto from the series A Sensitive Education

PVF 2021: Lotti Geahčastat


NABAI JUOS VUORAŽAS MÁHTÁŠII GOVVET? MAKKÁR GOVAID DAT GOVVEŠE? MAKKÁR MÁILBMI LIVČČE OLGGOSOAIDNIT, JUOS DAT LIVČČE GOVVEJUVVON LOTTI GEAHČČANGUOVLLUS? VIĐÁT POLITIHKALAŠ ČUOVGAGOVA FESTIVÁLA NAMMA LEA “LOTTI GEAHČASTAT”, JA DAT RAHPASA GOLGGOTMÁNUS 2021. FESTIVÁLA ULBMIL LEA GOVAID BOKTE VIHKKEDALLAT SÁHTTÁGO OLMMOŠ GOVAHALLAT MO LODDI OAIDNÁ MÁILMMI JA DAN BOKTE OAHPPAT EARÁLÁHKAI ÁDDET MÁILMMI.


Govven ja máilmmi ovdanbuktin govaiguin leat iežas oasis váikkuhan dasa mo mii áddet olbmo ja eará elliid sierranasvuođa. Kamera linsa lea álggoálggus hábmejuvvon muittuhit olbmo čalmmi struktuvrra, ja kameraid teleoptihkká, čieguskamerat ja fuođđokamerat leat addán olbmuide vejolašvuođa bahkket elliid servošiidda gáiddusoktavuođa bokte.

Maiddái loddeperspektiiva, nappo áimmus govven, lea leamaš guovddáš elemeanta olmmošguovdasaš boahttevuođaoskkus, mii gildái mannan čuohtelogu álgogeahčen. Áibmojohtolaga ovdáneapmi luittii olbmo gravitašuvnna čatnasiin ja gávpogiid alla ráhkkanusat loktejedje olbmo bajás čuovvut duhtavažžan industriijalaš ja urbána ovdánumi. Geahččanguovllu sirdáseapmi bajás dulbii máilmmi, jávkadii almmiravdda ja sehkkii dan mo mii oaidnit ja áddet fysalaš áššiid sturrodaterohusaid. Čuovgagovat, maid leat govven loddeperspektiivvas, leat rievdadan dan, mo mii oaidnit govaid ja máilmmi. Dát govat leat govvejuvvon earálágan geahččanguovllus, go mas mii dán máilmmi áicat, ja danin daid dulkomis dárbbašit ođđalágan govaiddulkondáidduid. Dákkár govaid geavahanvuogit leat maŋŋel boahtán dovddusin earret eará kártaappaid ja ođđa áiggi soahtamii laktáseaddji govaid bokte.

Loddeperspektiiva – lotti geahččanguovlu ja ealli geahčastaga fuomášeapmi – dagai vejolažžan maiddái ođđa vuogi govahallat lotti geahččanguovllu ja ealli geahčastaga. Dat álggii iežas oasis rievdadit áddejumi olmmošguovdasaš luonddu govvemis. Ealli geahččanguovllu fuomášeapmi buvttii jearaldatvuollásažžan oarjemáilmmi dáidaga ráhkadan áddejumi das, ahte ealli lea olbmo speajal. Ovdal elliid govat ledje čájehan olbmuide, makkárat ja geat mii leat. Ealli lei dego speajal; speajal (ealli) ii ieš geahččan, dušše máhcahii geahčastaga ruovttoluotta dan oruhii (olbmui), guhte dasa geahčai.

Olmmoš lea oahppan ollu iežas birra, go son lea geavahan elliid speajalin. Muhto juos mii heaitit geavaheamis elliid speajalin ja mieđihit, ahte dain leat iežas geahčastagat, mii sáhttit oahppat máilmmi birra vel ollu eanet. Eará šlájaid geahččanguovllu ja eallinvuogi ádden dieđu ja govahallama bokte lasiha empatiija, mii dárbbašuvvo olbmuid ja eará šlájaid ovttaseallimis.

Lottiid bokte mii sáhttit guorahallat maiddái olbmo čalmmehisvuođa das, go eat oainne mo eallišlájat jávket min birra. Dát issoras stuorra nuppástus, mii dáhpáhuvvá gulul, lea masá oaidnemeahttun. Čáppa govvosat, maid stárradoahkit áimmus ráhkadit, eai jur šat oidno. Idjalotti gullá giđđaijaid ain hárvvebut. Gordnebealdduin lea jávkan bealdocihci čáppa jietna. Bohtetgo lottiid jienat čuodjat dušše jietnabáttiin gávpeguovddážiid váccahagain?

Juos vuoražas govvešii, nagodivččego dat dokumenteret eallišlájaid jávkama vai govvešiigo dat ruskalána? Čájehivččego viisses loddi čuovgagovaiguin midjiide olbmuide, mo mii sáhtášeimmet oaidnit máilmmi maiddái eará šlájaid geahččanguovllus?


Čàjàhusas mielde earret earà:


Supporters and partners 2021